ვენესუელის გაზეთის Correo del Orinoco-ს ინფორმაციით, ქვეყნის პრეზიდენტმა 16 კრიპტოვალუტის ბირჟას სერტიფიკატები მიანიჭა. ეს ფაქტი საერთაშორისო ბაზარზე ხელს შეუწყობს ვენესუელის ეროვნულ კრიპტოვალუტა პეტროთი ოპერაციების შესრულებას.
“16 ბირჟის სერთიფიცირება პეტროს სისტემის სანდოობას აჩვენებს”,-განაცხადა ნიკოლას მადურომ.
მადურომ პეტროს წინასწარი გაყიდვის ოფიციალურად დახურვა 19 მარტს გამოაცხადა. ვენესუელის პრეზიდენტმა იქვე აღნიშნა, რომ წინასწარი გაყიდვიდან პრისეილის შეწყვეტამდე პეტროდან მიღებულია 3.3 მილიარდი დოლარი, ხოლო კრიპტოვალუტის ვაჭრობაში 127-ზე მეტი ქვეყანა მონაწილეობდა.
“მე უნდა განვაცხადო პეტროს პირველი წინასწარი გაყიდვის დახურვაზე. პრისეილი დაიხურა 3.3 მილიარდზე. ეს ეკონომიკური სასწაულია!”-განაცხადა ნიკოლას მადურომ.
ნიკოლას მადურომ ისიც აღნიშნა, რომ 1 მილიარდ დოლარს, რომელიც პეტროს ვაჭრობიდან არის შემოსული ქვეყნის ტრადიციული ეკონომიკის განვითარებას მოახმარს.
შეგახსენებთ, რომ ნიკოლას მადურო ვენესუელის ეროვნული კრიპტოვალუტის შექმნას 21-ე საუკუნის პროექტად აფასებდა. ამასთანავე, პეტეროს წინასწარი გაყიდვის დაწყებიდან რამდენიმე დღეში ვენესუელის მთავრობამ კრიპტოვალუტის შესახებ უფასო ტრენინგ-კურსების ჩატარება დაიწყო. ტრენინგი ქვეყნის იმ მოქალაქეებისთვის იყო განკუთვნილი, ვისაც სურდა კრიპტოვალუტის შესახებ ყველანაირი სახის ინფორმაცია მიეღო.
