ირლანდიის კრიპტოვალუტის კომპანიებს მომავალი თვიდან პირველად მოუწევთ ფულის გათეთრებისა და ტერორიზმის დაფინანსების საწინააღმდეგო ზომების მიღება.
ირლანდიის ცენტრალურმა ბანკმა ფულის გათეთრების წინააღმდეგ ბრძოლის სახელმძღვანელო პრინციპებში ტერორიზმის დაფინანსებაც შეიყვანა.
ახალი წესების დაცვა ევროკავშირის დირექტივიდან გამომდინარეობს.
კომპანიები, რომლებიც მუშაობენ ციფრული ვალუტის გამოყენებით, ასევე ნებისმიერი ფირმა, რომელიც მათ მომსახურებას უწევს, ვალდებულია კლიენტების თანხის წარმომავლობა და დანიშნულება გულდასმით შეამოწმოს.
ირლანდიის FinTech & Payments ასოციაციის თანათავმჯდომარე, ჯოშ ჰოგანი რეგულაციების მომხრეა.
”ირლანდიას აქვს შესაძლებლობა ისარგებლოს კარგი რეპუტაციით, როგორც ფინანსთა, ასევე ტექნოლოგიური თვალსაზრისით. ქვეყანას შეუძლია ერთ-ერთი საუკეთესო იურისდიქცია ჰქოდეს, სადაც ევროკავშირის რეგულაციების მიხედვით კრიპტო მომსახურების ბიზნესი იმუშავებს. ეს საბოლოოდ მოიტანს რეალურ კომერციულ სარგებელს სამუშაო ადგილების, შემოსავლებისა და გადასახადების მხრივ,”-განაცხადა FinTech & Payments ასოციაციის თანათავმჯდომარემ.
შეგახსენებთ, რომ მეხუთე დირექტივა, რომელიც ძალაში შევიდა 2018 წლის 9 ივლისს, ახალ სამართლებრივ ბაზას ადგენს, რომელიც ფულის გათეთრებასა და ტერორიზმის დაფინანსებას ეხება. დირექტივა, რა თქმა უნდა, კრიპტოვალუტების რეგულაციის საკითხსაც მოიცავს.
