მსოფლიოში სიდიდით მეორე კრიპტოვალუტის ბირჟა Binance-ი Blockchain-ზე დაფუძნებული ბანკის შექმნას გეგმავს.
ამის შესახებ Bloomberg-ი იტყობინება.
გავრცელებული ინფორმაციით, მომავალი ბანკი მალტაში იქნება დაფუძნებული. მალტა თავის მხრივ, ცნობილია, როგორც კრიპტოვალუტის მიმართ პოზიტიურად განწყობილი ქვეყანა.
ასევე Bloomberg-ის ცნობით, Binance-მა უკვე 5%-იანი ინვესტიცია განახორციელა, სხვა წამყვან ინვესტორებთან ერთად. ბანკის შესაქმნელად 155 მილიონი აშშ დოლარი შესაბამის ანგარიშზე უკვე გადარიცხულია.
პროექტი მიზნად ისახავს გახდეს მსოფლიოში პირველი დეცენტრალიზებული ბანკი. როგორც Bloomberg-ი აღნიშნავს, ოპერაციების დაწყებამდე ბანკმა უნდა მოიძიოს კუნძულის მარეგულირებლის ლიცენზია, რომელიც შესაბამისობაში მოდის ევროკავშირის ფინანსურ კანონმდებლობასთან.
მედიაში გავრცელებული ინფორმაციის მიხედვით, სილვიო შემბერიმ, მალტის პრემირ-მინისტრის ადმინისტრაციის წარმომადგენელმა განაცხადა, რომ კუნძულისთვის პატივია, რომ შეირჩა პირველი გლობალური საზოგადოების საკუთრებაში არსებული ბანკის შექმნის ადგილად.
